افغان حکومت له پاکستان څخه غواړي چې خپل دوګوني سیاست ته د پای ټکی کېږدي او هغه ډلې چې له تاوتریخوالي لاس نه اخلي، لهمنځه یوسي.
د ځینو پاکستانۍ رسنیو د رپوټونو له مخې، امریکا د ۲۰ ترهګرو ډلو نوملړ اسلام اباد ته سپارلی. هغه ډلې چې په پاکستان او افغانستان کې فعالیت لري. خو افغانستان لا هم تمه لري چې پاکستان به یې ښه ګاونډی شي.
د اجراییه رییس د ویاند مرستیال امید میثم په دې اړه څرګنده کړه:«ترهګرۍ ډلې نه یوازې د افغانستان ګټو، ملت او حکومت ته بلکې د پاکستان سیمهییزو او نړیوالو هېوادونو ګټې له ګواښ سره مخ کړي. اړتیا ده چې د سیمې په کچه یوه همپالنه او همغږي د صداقت پر مټ رامنځته شي ترڅو موږ په سیمه او د افغانستان د وضعیت د ښه والي شاهد واوسو.»
د هغو ډلو نوملړ چې واشنګټن اسلام اباد ته سپارلې په درې برخو کې دی: هغه ډلې چې د پاکستان له خاورې پر افغانستان بریدونه کوي. دویم هغه ډلې چې پاکستان کې ترهګریز فعالیتونه کوي. او هغه ډلې چې په کشمیر کې فعالې دي.
خو د دې نوملړ په سر کې حقاني شبکه ځای لري. هغه ډله چې د امریکا په باور د پاکستان قبایلي سیمو کې پټنځایونه لري او له همدې پټنځایونو په افغانستان کې د بې ثباتۍ په برخه کې ترې کار اخلي.
د مشرانو جرګې د کورني امنیت د کمېسیون غړی نادر بلوچ په دې اړه وویل:«کهچېرې نړیواله ټولنه، ناټو او د سیمې هېوادونه په پاکستان کې له ترهګرۍ سره د مبارزې په کار کې همکاري ونهکړي، پاکستان اټومي وسله لري او دغه وسله به سیمه له ګواښ سره مخ کړي.»
حرکت المجاهدین، جیش محمد، جندالله، لشکر طیبه، لشکر جنگوی، القاعده، داعش او د پاکستاني طالبانو تحریک هغه ډلې دي چې د امریکا له لورې پاکستان ته سپارل شوي نوملړ کې دي.
د پوهنتون استاد نصرالله ستانکزي په دې اړه څرګنده کړه:«زه فکر کوم په پای کې به فشارونه خپلې اغېزې ولري. خو په سادهګۍ سره فکر نه کوم چې پاکستان دې له ناټو په ځانګړې توګه له امریکا د امتیاز څخه پرته په خپل سیاست کې بدلون راوړي.»
داسې رپوټونه هم خپاره شوي چې د امریکا د بهرنیو چارو وزیر پاکستان ته په سفر کې، پاکستاني چارواکو ته د ۷۵ تنه ترهګرو نوملړ سپارلی.
تر دې وړاندې د افغانستان د بهرنیو چارو وزارت هم د پاکستان په خاوره کې د ترهګرو د دوه دېرش مرکزونو نوملړ اسلام اباد ته سپارلی و.
http://www.tolonews.com/pa/afghanistan
No comments:
Post a Comment